Ath còr des Pirenèus, ena carretèra que puge de Bossòst entath Pòrt deth Portilhon, Aran Park ei un parc de fauna qu'aculhís mès d'ua quinzena d'espècies autoctones dera Val d'Aran e des montanhes pirenaiques en semi-libertat. En un entorn naturau de quasi vint ectàrees, es visitants pòden descurbir e observar de pròp animaus emblematics coma er ors ròi, eth linx, eth lop gris, eth lop artic, es lueires, es marmòtes, es arrians, es cèrvis, es cabiròus, es dams, es moflons, er isard e era craba sauvatja, entre d'auti. Eth recorrut, circular e completament transitable, dure aproximadament dues ores damb un desnivèu de cent mètres, e ei adaptat entà que se pogue hèr damb cochets de mainatge o per persones damb dificultats de mobilitat. Ath long deth trajècte i a ua zòna de picnic, un espaci de bar-cafeteria e ua petita granja infantila damb animaus domestics. Eth centre d'interpretacion, plaçat ena antiga casèrna dera Guàrdia Civil, complète era visita damb contenguts educatius sus era fauna, es sons, es peades e er abitat des espècies pirenaiques. Un plan ideau entàs familhes e ua des atraccions toristiques mès importantes deth Baish Aran, damb ua clara vocacion educativa e de conservacion.